Kredit — imkoniyat, tadbirkorlik esa barqaror daromad manbai. Termiz shahrida aholini kambag‘allikdan chiqarish, bandligini ta’minlash va mahallalarning iqtisodiy salohiyatidan samarali foydalanish borasidagi ishlar deputatlik nazorati doirasida o‘rganilmoqda.

Navbatdagi o‘rganish Xalq deputatlari Termiz shahar Kengashi kotibiyati bosh mutaxassisi R.Mamashukurov hamda Kengashning 17-“Surxon sohili” saylov okrugi deputati B.Rahmatullayev tomonidan “Surxon sohili” mahallasida amalga oshirildi.
Jarayon davomida mahalla hokim yordamchisining aholi bandligini ta’minlash, tadbirkorlik tashabbuslarini qo‘llab-quvvatlash va oilalar daromadini oshirish borasidagi faoliyati tahlil qilindi. Shuningdek, fuqarolar bilan ochiq muloqot o‘tkazilib, mahallada ko‘rsatilayotgan xizmatlar sifati, mavjud imkoniyatlar va aholini tadbirkorlikka jalb etish masalalari yuzasidan fikr almashildi.

O‘rganish davomida amaliy natijalardan biriga ham guvoh bo‘lindi. Jumladan, ajratilgan kredit mablag‘lari hisobidan mahallada temirchilik faoliyati yo‘lga qo‘yilgan. Natijada oila uchun o‘z mehnati orqali daromad topish imkonini beruvchi tadbirkorlik manbai yaratilgan.

Bu kabi tashabbuslar fuqarolarning iqtisodiy faolligini oshirish, oilalarning o‘z daromadiga ega bo‘lishiga ko‘maklashish va kambag‘allikni qisqartirishda muhim ahamiyat kasb etadi.

Mazkur ishlar O‘zbekiston Respublikasi Oliy Majlisi Senati Kengashining 2024-yil 29-noyabrdagi KQ-6-V-son qarori doirasida belgilangan kambag‘allikni qisqartirish, aholini daromadli mehnatga jalb etish va oilaviy tadbirkorlikni rivojlantirish vazifalari bilan hamohangdir.

O‘rganish yakunida deputatlar hokim yordamchisiga tadbirkorlik qilish istagidagi fuqarolarni qo‘llab-quvvatlash, ehtiyojmand oilalar uchun mavjud imkoniyatlardan samarali foydalanish hamda daromad manbalarini kengaytirish bo‘yicha tegishli tavsiyalar berdilar.

Maqsad — har bir mahallada yangi imkoniyatlar yaratish, har bir oilaning daromadini oshirish va aholi farovonligini ta’minlashga amaliy hissa qo‘shish.