Xalq deputatlari Qo‘qon shahar Kengashi komissiya raisi, deputat M.Aminova tomonidan “Misgarlik” mahallasidagi yo‘l infratuzilmasini yaxshilash va Yangi obod ko‘chasini asfaltlash masalasi yuzasidan navbatdagi deputatlik so‘rovi yuborildi.

Saylovchilar bilan o‘tkazilgan uchrashuvlar, mahallalarda olib borilgan o‘rganishlar hamda bevosita joyiga chiqib ko‘zdan kechirishlar davomida fuqarolar tomonidan “Misgarlik” mahallasi, Yangi obod ko‘chasining asfalt qoplamasini ta’mirlash yuzasidan bir necha bor murojaatlar bildirilgani aniqlandi. Ko‘chaning asfalt qoplamasi yaroqsiz holga kelgani hudud aholisi uchun turli noqulayliklarni keltirib chiqarayotgani sababli, deputat tomonidan Qo‘qon shahar Obodonlashtirish boshqarmasi boshlig‘i A.Axmedov nomiga deputatlik so‘rovi yuborildi.

Deputatlik so‘rovida “Misgarlik” mahallasi, Yangi obod ko‘chasidagi asfalt qoplamasini ta’mirlash va yo‘l holatini yaxshilash bo‘yicha qanday chora-tadbirlar belgilanganligi yuzasidan ma’lumot berish so‘ralgan.

Shuningdek, so‘rovda mazkur ko‘chada ta’mirlash ishlarini amalga oshirish muddatlari, rejalashtirilgan ishlar ko‘lami hamda mavjud muammoni bartaraf etish bo‘yicha ko‘riladigan choralar yuzasidan aniq muddatlar ko‘rsatilgan holda asoslantirilgan tushuntirish taqdim etish talab qilingan.

Mazkur masala deputat nazoratiga olingan bo‘lib, qonunchilikda belgilangan 10 kunlik muddatda deputatlik so‘roviga javob taqdim etilishi hamda yo‘l infratuzilmasini yaxshilash yuzasidan amalga oshiriladigan ishlar haqida qo‘shimcha ma’lumot berib boriladi.

Xalq deputatlari Qo‘qon shahar Kengashi