Mazkur o‘rganish Xalq deputatlari Sardoba tumani Kengashi kotibiyati mudiri Q.O‘tayev rahbarligidagi ishchi guruh tomonidan tuman Kambag‘allikni qisqartirish va bandlikka ko‘maklashish bo‘limida deputatlar J.Umarov, S.Abduvaliyeva va G. Absatovalar ishtirokida amalga oshirildi.
O‘rganish jarayonida tumanda aholi bandligini ta’minlash, ishsiz va ish qidirayotgan fuqarolarni aniqlash, ularni kasb-hunarga o‘qitish va qayta tayyorlash, bo‘sh ish o‘rinlariga yo‘naltirish, o‘zini o‘zi band qilish imkoniyatlarini kengaytirish hamda tadbirkorlik faoliyatini boshlash istagida bo‘lgan fuqarolarni qo‘llab-quvvatlash borasida amalga oshirilayotgan ishlar tahlil qilindi.
Shuningdek, bo‘lim tomonidan aholi murojaatlari bilan ishlash holati, ishsiz fuqarolarni hisobga olish va ularning bandligini ta’minlash bo‘yicha ko‘rilayotgan choralar, yaratilgan ish o‘rinlarining barqarorligi hamda aholiga ko‘rsatilayotgan bandlik xizmatlarining samaradorligiga alohida e’tibor qaratildi.
Ishchi guruh tomonidan bandlik sohasidagi ishlar samaradorligini baholash maqsadida tegishli hujjatlar, hisobotlar va ma’lumotlar ko‘rib chiqilib, belgilangan vazifalarning amaldagi ijrosi o‘rganildi. Aniqlangan holatlar yuzasidan mas’ul xodimlarning tushuntirishlari eshitilib, mavjud muammolar va ularni bartaraf etish choralari muhokama qilindi.
O‘rganish davomida aholi bandligini ta’minlashda faqat ish o‘rinlarini yaratish bilan cheklanib qolmasdan, fuqarolarni doimiy daromad manbaiga ega bo‘lishiga ko‘maklashish, kasbiy salohiyatini oshirish va mehnat bozori talablariga mos kasblarga yo‘naltirish muhimligi ta’kidlandi.
Shu bilan birga, ishsiz fuqarolarni, ayniqsa, mehnat bozorida qiyinchilikka duch kelayotgan aholi qatlamlarini manzilli qo‘llab-quvvatlash, ularning bandligini ta’minlash bo‘yicha amalga oshirilayotgan ishlarni mahallalar kesimida yana-da kuchaytirish yuzasidan mas’ullarga tegishli tavsiya va ko‘rsatmalar berildi.
Mazkur o‘rganishdan asosiy maqsad — “Aholi bandligi to‘g‘risida”gi Qonun talablarining tumanda samarali ijrosini ta’minlash, fuqarolarning mehnat qilish va munosib ishga ega bo‘lish huquqlarini ro‘yobga chiqarish, ishsizlik darajasini kamaytirish hamda aholi daromadlarini oshirishga qaratilgan chora-tadbirlarni yana-da takomillashtirishdan iborat.
Xalq deputatlari tuman Kengashi deputatlari tomonidan bandlik sohasida amalga oshirilayotgan ishlar ustidan deputatlik nazoratini izchil davom ettirish, aniqlangan muammolarni bartaraf etish va aholi bandligini ta’minlashga qaratilgan chora-tadbirlarning natijadorligini oshirish muhim vazifalardan biri ekanligi qayd etildi.