Xalq deputatlari Yangiobod tuman Kengashi deputati Abdunabi Isroilov tomonidan maktabgacha ta’lim tashkilotlarida ta’lim-tarbiya jarayonini samarali tashkil etish hamda bolalar uchun munosib sharoitlar yaratish maqsadida navbatdagi deputatlik so‘rovi kiritildi.

Deputatlik nazorati doirasida Sarmich MFY hududida joylashgan 3- 8- va 10-sonli davlat maktabgacha ta’lim tashkilotlarida o‘rganish ishlari olib borildi.

O‘rganish natijasida mazkur bog‘chalarda tarbiyalanuvchilar uchun zarur shart-sharoitlarni yaratishga salbiy ta’sir ko‘rsatayotgan quyidagi jiddiy kamchiliklar aniqlandi:

3-sonli DMTTda: tarbiyalanuvchilar uchun ovqatlanish jarayonini belgilangan talablar asosida tashkil etish uchun zarur bo‘lgan oshxona jihozlari yetarli emas;

8-sonli DMTTda: tibbiyot xonasi mavjud emas, shuningdek, tarbiyalanuvchilarga birlamchi tibbiy yordam ko‘rsatish uchun zarur dori-darmon va tibbiy buyumlar bilan ta’minlanganlik holati talab darajasida emas;

10-sonli DMTTda: tarbiyalanuvchilarning foydalanishi uchun mo‘ljallangan hojatxona mavjud emasligi aniqlandi.

Shu munosabat bilan, 2026-yil 29-sentabrdagi 66-ds-457-26-sonli deputatlik so‘rovi Yangiobod tuman Maktabgacha va maktab ta’limi bo‘limi boshlig‘i E. Muxtorovga yo‘llandi.

So‘rovda yuqorida ko‘rsatib o‘tilgan kamchilik va muammolarni bartaraf etish hamda amalga oshirilgan ishlar to‘g‘risida belgilangan tartibda axborot berish so‘ralgan.