#sessiya #poytaxtdeputatlari #deputatlik_faoliyati

❗️Dual ta’lim jarayonlari va o‘quvchilarning mehnat sharoitlari muhokama qilindi

🏛 Xalq deputatlari Toshkent shahar Kengashining yigirma yettinchi sessiyasida kasbiy ta’lim tizimida amalga oshirilayotgan ishlar, xususan, dual ta’lim olayotgan o‘quvchilarning korxonalardagi faoliyati va mehnat sharoitlari deputatlar tomonidan muhokama qilindi.

🔺 SAVOL: Deputat Sadriddin Turobjonov o‘quvchilarning qaysi korxonalarda faoliyat olib borayotgani, u yerdagi sharoitlar mutasaddilar tomonidan joyiga chiqib o‘rganilgan-o‘rganilmagani yuzasidan savol yo‘lladi. Shuningdek, dual ta’lim jarayonlarini tegishli doimiy komissiya ishtirokida joyiga chiqib o‘rganishni taklif etdi.

📝 Kengash raisi Rustamxon Kalanov dual ta’lim asosida korxonalarda ishlayotgan o‘quvchilarga ish haqi o‘z vaqtida to‘lanishi va bu jarayonning nazoratga olingani yuzasidan savol berdi. U o‘quvchilarning mehnat huquqlari ta’minlanishi hamda korxonalardagi mavjud holatni deputatlar ishtirokida o‘rganish zarurligini ta’kidladi.

🗣 JAVOB: Toshkent shahar kasbiy ta’lim boshqarmasi boshlig‘i vazifasini vaqtincha bajaruvchi Javlonbek Xo‘jamqulov o‘quvchilarga stipendiya davlat budjeti hisobidan to‘lanishi, dual ta’lim ishtirokchilari esa o‘qish bilan bir vaqtda ishlab, belgilangan tartibda ish haqi bilan ta’minlanayotganini ma’lum qildi. Shuningdek, Shayxontohur tumanidagi o‘quvchilar bilan birgalikda Jizzax viloyatidagi “BI Servica” ishlab chiqarish korxonasi faoliyati joyiga chiqib o‘rganilgani bildirildi.

⏺️ Kengash raisi tegishli doimiy komissiya a’zolariga sessiyadan so‘ng o‘rganish sanasini belgilab, dual ta’lim jarayonlari va o‘quvchilarga yaratilgan sharoitlar bilan joyiga chiqib tanishish vazifasini berdi.

📱 Telegram 📱 Instagram 📱 Facebook 📱 YouTube 🔎 E-kengash