Xalq deputatlari Bag‘dod tumani Kengashi deputati Xamrakulov Doniyor Toxirovich tomonidan Bag‘dod tumani Elektr tarmoqlari korxonasi boshlig‘i V.To‘ychiyevga 2026-yil 8-oktabr kuni 79-ds-287-26-sonli deputat so‘rovi yuborildi.

📊 Deputat so‘rovida Xalq deputatlari Bag‘dod tumani Kengashi deputatlarining saylovchilar bilan uchrashuvlari hamda hududlarda mavjud muammolarni o‘rganish yuzasidan tasdiqlangan reja-jadvalga muvofiq, Do‘stlik mahalla fuqarolar yig‘ini hududida o‘rganish ishlari olib borilgani qayd etildi.

✅ O‘rganishlar davomida Farovon ko‘chasida jami 90 ta xo‘jalik mavjud bo‘lib, mazkur xonadonlar hamda hududdagi tadbirkorlik subyektlari 160 kVA quvvatdagi transformator orqali elektr energiyasi bilan ta’minlanib kelinayotgani aniqlandi.

⚡️ Shu bilan birga, mavjud transformator quvvati iste’molchilarning elektr energiyasiga bo‘lgan ehtiyojini to‘liq qoplamayotgani, ayniqsa, elektr energiyasiga talab oshadigan davrlarda elektr kuchlanishining pasayishi kuzatilayotgani qayd etildi.

✅ Mazkur holat fuqarolarning xonadonlarida maishiy elektr jihozlaridan foydalanishida, shuningdek, hududdagi tadbirkorlik subyektlari faoliyatini barqaror tashkil etishda qator noqulayliklarni yuzaga keltirmoqda.

✅ Shu munosabat bilan, aholini sifatli va barqaror elektr energiyasi bilan ta’minlash, shuningdek, tadbirkorlik subyektlarining faoliyati uchun zarur elektr ta’minotini yaxshilash maqsadida Farovon ko‘chasida qo‘shimcha transformator o‘rnatish zarurati mavjudligi bildirildi.

📌 Yuqoridagilarni inobatga olib, O‘zbekiston Respublikasining “Xalq deputatlari viloyat, tuman va shahar Kengashi deputatining maqomi to‘g‘risida”gi Qonunining 8-moddasiga muvofiq, deputat so‘rovida Do‘stlik MFY hududidagi Farovon ko‘chasida elektr ta’minoti barqarorligini ta’minlash maqsadida qo‘shimcha transformator o‘rnatish masalasini o‘rganib, tegishli amaliy choralar ko‘rish so‘raldi.