Xalq deputatlari Qo‘qon shahar Kengashi raisi O‘.Tojiyeva tomonidan “Nurafshon” mahalla fuqarolar yig‘ini, Firdavsiy ko‘chasi, 18-uyda yashovchi fuqaro I.Tursunova xonadonida o‘rganish ishlari olib borildi.

O‘rganish jarayonida Kengash kotibiyati mudiri A.Nosirov, mahalla ijtimoiy xodimi R.Yunusov hamda xotin-qizlar faoli X.Ergasheva hamrohligida fuqaroning yashash sharoiti, oilaviy holati va mavjud ehtiyojlari o‘rganildi.

O‘rganish davomida fuqaro I.Tursunova farzandlarini maktabgacha ta’lim muassasasiga joylashtirish hamda buning uchun amaliy yordam ko‘rsatish masalasida murojaat qildi.

Murojaat yuzasidan fuqaroning oilaviy sharoiti va ijtimoiy holati o‘rganilib, farzandini mahalla hududidagi 57-sonli maktabgacha ta’lim tashkilotiga joylashtirish masalasi ko‘rib chiqildi.

Shuningdek, fuqaro ijtimoiy reyestrga kiritilganligi inobatga olinib, farzandining maktabgacha ta’lim tashkilotida bo‘lishi uchun belgilangan oylik to‘lovni imtiyozli tartibda bepul amalga oshirish masalasini hal etish bo‘yicha mahalla xotin-qizlar faoli X.Ergashevaga tegishli topshiriq berildi.

Mazkur masala deputatlik nazoratiga olindi. Belgilangan topshiriqlarning ijrosi, farzandni maktabgacha ta’lim tashkilotiga joylashtirish hamda oilaga yaratiladigan imtiyozlardan to‘liq foydalanish imkoniyatlari nazorat qilib boriladi.

Xalq deputatlari Qo‘qon shahar Kengashi