Bolajonlarga mehr va e’tibor ko‘rsatildi

1-iyun — Xalqaro bolalarni himoya qilish kuni munosabati bilan Namangan shahar hokimligi tomonidan ota-ona qaramog‘idan mahrum bo‘lgan voyaga yetmagan bolajonlar uchun mazmunli va unutilmas madaniy tadbir tashkil etildi.

Tadbirda Namangan shahar hokimi, Xalq deputatlari Namangan shahar Kengashi deputati A. Kamalov ishtirok etib, Prezidentimizning bayram tabrigini bolajonlarga yetkazdi hamda ular uchun tayyorlangan maxsus sovg‘alarni topshirdi.

Samimiy ruhda o‘tgan uchrashuv davomida A.Kamalov bolajonlar bilan bir dasturxon atrofida suhbat qurib, ularning qiziqishlari, 

orzu-intilishlari, muammo va takliflari bilan yaqindan tanishdi.

Bolalar uchun tashkil etilgan bayram dasturi quvonch va iliq taassurotlarga boy bo‘ldi. Tadbir davomida bolajonlarga alohida e’tibor va g‘amxo‘rlik ko‘rsatilib, ular uchun yaratilgan sharoitlar va imkoniyatlar haqida so‘z yuritildi.

Tadbir yakunida bolajonlar mas’ullar hamrohligida Zahiriddin Muhammad Bobur nomidagi madaniyat va istirohat bog‘iga tashrif buyurib, turli ko‘ngilochar maskanlarda maroqli hordiq chiqardilar. Ularning yuzidagi beg‘ubor tabassum va ko‘tarinki kayfiyati bayramning eng katta yutug‘i bo‘ldi.

Farzandlar baxti va kamoloti yo‘lida ko‘rsatilayotgan bunday e’tibor va g‘amxo‘rlik yosh avlod qalbida mehr-muhabbat, ishonch va ertangi kunga umid tuyg‘ularini yanada mustahkamlashga xizmat qiladi. 

Xalq deputatlari Namangan shahar Kengashi deputatlari tomonidan ham bolalar manfaatlarini ta’minlash, ularni har tomonlama qo‘llab-quvvatlash va munosib sharoitlar yaratishga qaratilgan ishlarga alohida e’tibor qaratib kelinmoqda.