Oliy Majlis Senati tomonidan 22-sentabr kuni o‘tkazilgan seminarda belgilangan vazifalar ijrosini hududlarda tizimli tashkil etish doirasida mahallalarda manzilli o‘rganishlar davom etmoqda.

Shu maqsadda Xalq deputatlari Farg‘ona viloyati Kengashi deputati Z.G‘ofurova, Xalq deputatlari Marg‘ilon shahar Kengashi kotibiyat mudiri A.Ermatov, Korrupsiyaga qarshi kurashish va xavfsizlik masalalari bo‘yicha doimiy komissiya raisi X.Abdurahmonov hamda Kotibiyat bosh mutaxassislari Z.Yakubova va N.Akbarova tomonidan 10-Bobur saylov okrugi hududidagi “Yovqochar” mahallasida o‘rganish olib borildi.

O‘rganish davomida mahallada aholi bandligini ta’minlash, doimiy daromad manbalarini yaratish, kambag‘allikni qisqartirish hamda ijtimoiy xizmatlarning manzilliligi bilan bog‘liq masalalarga e’tibor qaratildi.

Mahalladagi mavjud ijtimoiy holat, jumladan, Ijtimoiy reyestrga kiritilgan fuqarolar va kambag‘al oilalar bilan ishlash jarayoni o‘rganildi. Ma’lumotlarga ko‘ra, mahallada Ijtimoiy reyestrda 93 nafar fuqaro mavjud bo‘lib, kambag‘al oilalar soni 55 tani tashkil etadi.

O‘rganish davomida ijtimoiy xizmatlarni tashkil etish va aholining ehtiyojmand qatlamlari bilan ishlash holati yuzasidan mahalla ijtimoiy xodimi M.Zokirova tomonidan amalga oshirilayotgan ishlar ham ko‘rib chiqildi.

Deputatlar tomonidan mavjud ko‘rsatkichlarni shunchaki qayd etish bilan cheklanib qolmasdan, reyestrga kiritilgan fuqarolar va kambag‘al oilalarning har biri bilan manzilli ishlash, ularning muammolarini aniqlash, bandligini ta’minlash hamda barqaror daromad manbalarini shakllantirish masalalariga alohida e’tibor qaratildi.

Shuningdek, aniqlangan masalalarni tegishli tashkilotlar bilan hamkorlikda hal etish va ularning ijrosini deputatlik nazorati orqali kuzatib borish zarurligi qayd etildi.

Mazkur o‘rganishlar Senat seminarida belgilangan vazifalarni mahallalar kesimida amaliyotga tatbiq etish, aholi bilan bevosita ishlash va kambag‘allikni qisqartirishga qaratilgan ishlarning natijadorligini oshirishga qaratilgan.