Xalq deputatlari Qo‘qon shahar Kengashiga 22-“Charxini ko‘prigi” saylov okrugidan saylangan deputat G.Rasulova tomonidan “Qalandarxona” mahalla fuqarolar yig‘inida “Mahalla yettiligi” faoliyati, hududda amalga oshirilayotgan ishlar hamda aholi murojaatlari bilan ishlash holati o‘rganildi.

O‘rganish davomida deputat “Mahalla yettiligi” a’zolari bilan suhbatlashib, mahallada kambag‘allikni qisqartirish, reyestrda turuvchi oilalarning ijtimoiy holatini yaxshilash hamda ularni barqaror daromad manbaiga ega qilish borasida amalga oshirilayotgan ishlar yuzasidan fikr almashdi.

Shuningdek, kambag‘allik reyestrida turuvchi oilalarni xatlovdan o‘tkazish jarayonlari ham atroflicha muhokama qilindi. Har bir oilaning mavjud sharoiti, bandligi, daromad manbalari va ijtimoiy holatini o‘rganish orqali ularni kambag‘allikdan chiqarish bo‘yicha manzilli choralar ko‘rish muhimligi ta’kidlandi.

"Qalandarxona” mahallasida jami 29 ta kambag‘al oila reyestrga kiritilgan bo‘lib, amalga oshirilayotgan manzilli ishlar natijasida ularning 4 tasi reyestrdan chiqarilgan.

Uchrashuv davomida qolgan oilalarni ham reyestrdan chiqarish bo‘yicha ishlarni tizimli davom ettirish, mehnatga layoqatli fuqarolarni ish bilan ta’minlash, tadbirkorlik va boshqa daromadli faoliyat turlariga yo‘naltirish hamda oilalarning ijtimoiy-iqtisodiy holatini yaxshilash masalalariga alohida e’tibor qaratildi.

Xalq deputatlari Qo‘qon shahar Kengashi