Xalq deputatlari Bo‘stonliq tumani Kengashining 2026-yilga mo‘ljallangan ish rejasiga muvofiq O‘zbekiston “Milliy tiklanish” demokratik partiyasidan saylangan deputat F.Axmedov va kotibiyat xodimi N.Kurganova tomonlaridan Ko‘p tarmoqli markaziy poliklinika faoliyati o‘rganildi.

🔻O‘rganish davomida poliklinikada bemorlarni qabul qilish jarayonlari, tor mutaxassislar faoliyati, navbatlarni tashkil etish tizimi, aholi uchun yaratilgan shart-sharoitlar hamda tibbiy xizmatlar sifati tahlil qilindi. Shuningdek, tibbiy xodimlarning bemorlar bilan muomala madaniyati, murojaatlarga munosabati va xizmat ko‘rsatish samaradorligiga alohida e’tibor qaratildi.

🔻Poliklinikada raqamli texnologiyalarni keng joriy etish ishlari ham ko‘zdan kechirildi. Xususan, elektron tibbiy kartalarni yuritish, elektron navbat tizimi, raqamli ro‘yxatga olish xizmati, tibbiy ma’lumotlarni axborot tizimlari orqali shakllantirish va saqlash, elektron yo‘llanmalar hamda boshqa raqamli xizmatlarning amaldagi holati yuzasidan mas’ullar bilan suhbatlashildi.

🔻Shuningdek, imtiyozli toifaga kiruvchi fuqarolarni bepul dori vositalari bilan ta’minlash holati ham o‘rganildi. Dorixonadagi mavjud zaxiralar, dori vositalarining turlari, saqlash sharoitlari, hisobini yuritish tartibi hamda aholiga yetkazib berish mexanizmi yuzasidan ma’lumotlar olindi. Bepul dori vositalarining belgilangan tartib asosida tarqatilishi, ularning yetarli miqdorda mavjudligi va doimiy monitoring qilib borilishi masalalari muhokama qilindi.