ИШЛАБ ЧИҚАРИШ КОРХОНАЛАРИДА ЧАНГ-ГАЗ ТОЗАЛАШ УСКУНАЛАРИНИ ЎРНАТИШ МАСАЛАСИ ЎРГАНИЛДИ
Халқ депутатлари Янгиқўрғон тумани Кенгаши депутатлари иштирокида туманда фаолият олиб бораётган, атроф-муҳитга таъсири бўйича 1–2-тоифага кирувчи тадбиркорлик субъектлари вакиллари билан учрашув ўтказилди.
Экология бўлими масъуллари иштирокида ташкил этилган учрашувда ишлаб чиқариш корхоналари фаолияти давомида атмосфера ҳавосига чиқарилаётган зарарли ташламаларни камайтириш, экологик қонунчилик талабларига қатъий риоя этиш ҳамда корхоналарда замонавий чанг-газ тутгич ва тозалаш фильтрларини ўрнатиш масалалари муҳокама қилинди.
Депутатлар томонидан тадбиркорлик субъектларида атроф-муҳит муҳофазаси бўйича белгиланган талабларнинг бажарилиши, мавжуд чанг-газ тозалаш ускуналарининг ҳолати ҳамда улардан самарали фойдаланиш масалаларига алоҳида эътибор қаратилди.
Учрашув давомида тадбиркорларга ишлаб чиқариш жараёнида экологик хавфсизликни таъминлаш, атмосфера ҳавосини ифлослантиришнинг олдини олиш, зарур фильтр ва тозалаш ускуналарини белгиланган талаблар асосида ўрнатиш юзасидан тушунтириш ва тавсиялар берилди.
Шунингдек, аҳоли саломатлиги ва экологик барқарорликни таъминлаш мақсадида мазкур йўналишдаги ишлар депутатлик назорати доирасида мунтазам ўрганиб борилиши таъкидланди.