Olmaliq shahar Kengashi deputatlarining bilim va ko‘nikmalarini oshirish, qonunchilik bilan ishlash samaradorligini kuchaytirish maqsadida navbatdagi muhokama bo‘lib o‘tdi.

Yig‘ilishda asosiy e’tibor deputatlarning qonun ijodkorligi va hududiy muammolarni hal etishdagi mas’uliyatini oshirishga qaratildi.

📜Qonun ustuvorligi — faoliyat asosi

Muhokama markazida 96 ta amaldagi qonunlar va deputatlar faoliyatiga daxldor bo‘lgan 24 ta yo‘nalish turdi. Shahar Kengashi raisi Daniyar Karimov hamda Kotibiyat mudiri Sevar Qodirova tomonidan har bir yo‘nalish bo‘yicha deputatlarga quyidagi tavsiyalar berildi:

Qonunlar ijrosi: Har bir deputat o‘ziga biriktirilgan qonunlar doirasida hududlarda o‘rganishlar o‘tkazishi va ijrosini nazorat qilishi;

Hududiy faoliyat: Saylovchilar bilan ishlashda tizimli yondashuvni shakllantirish va muammolarni huquqiy doirada hal etish;

Tushuntirish ishlari: Yangi qabul qilingan qonun hujjatlarining mazmun-mohiyatini aholiga sodda tilda yetkazish.

⚙️ Muvofiqlashtirish va tizimli yondashuv

Kengash raisi tomonidan Kotibiyat xodimlari zimmasiga ham aniq vazifalar yuklatildi. Xususan, Sevar Qodirova, Mukarram Nematullayeva va Muhriddin Begmatovlarga:

🔹Deputatlar faoliyatini muntazam ravishda muvofiqlashtirib borish;

🔹Saylov okruglaridagi ishlarni tizimli tashkil qilishda uslubiy yordam ko‘rsatish;

🔹Deputatlik nazorati va so‘rovlarining natijadorligini tahlil qilib borish bo‘yicha ko‘rsatmalar berildi.

"Deputat — xalq va davlat o‘rtasidagi ko‘prik. Bizning har bir harakatimiz qonun doirasida va xalq manfaati uchun xizmat qilishi shart," — deya ta’kidlandi yig‘ilishda.

Ushbu o‘quv-uslubiy muloqot deputatlarning o‘z saylov okruglarida yanada faol va natijador ishlashlari uchun poydevor bo‘lib xizmat qiladi.