🟢O‘zbekiston Respublikasi Prezidentining 2025-yil 23-iyundagi PF-98-son Farmoni bilan deputatlar uchun kelgusi yillarda bir qator imtiyozlar va ular faoliyatiga aloqador vakolatlar berilishi nazarda tutilmoqda.

Birinchi navbatda deputatning deputatlik faoliyati bilan bog‘liq ishlar bilan shug‘ullanishi uchun uning asosiy ish joyi bo‘yicha ish beruvchilarning mas’uliyatini oshirish mexanizmi ishlab chiqiladi.

Bunda tashkilot rahbari o‘z xodimi bo‘lgan deputatni mahalliy Kengash sessiyasi, doimiy komissiya va partiya guruhi majlislarida ishtirok etish, saylovchilari bilan uchrashuvlar va fuqarolar qabullarini o‘tkazishga to‘sqinlik qilishiga yo‘l qo‘yilmasligi qonunchilikda belgilab qo‘yiladi.

Bundan tashqari, deputat faoliyati kafolatlarini yanada kuchaytirish maqsadida uning tegishli hududda joylashgan, moneliksiz kirishi mumkin bo‘lgan korxonalar, muassasalar hamda tashkilotlar doirasini va ularga kirish tartibini aniq belgilash nazarda tutilmoqda.

🟢Bu kabi imkoniyatlar xalq vakillariga tegishli hududda samarali deputatlik nazoratini amalga oshirish imkoniyatini yanada kengaytirishiga sharoit yaratadi.

Xolmurotov Yorqin Riskaliyevich – xalq deputatlari Bo‘stonliq tumani Kengashi deputati