Oʻzbekiston Prezidenti Shavkat Mirziyoyevning Vengriyaga tashrifi joriy yilda 30 yilligi nishonlanadigan ikki tomonlama hamkorlik tarixida yangi bosqichni boshlab berdi.

Budapeshtda boʻlib oʻtgan muzokaralar yakunlari boʻyicha Oʻzbekiston Prezidenti Shavkat Mirziyoyev va Vengriya Bosh vaziri Viktor Orban kengaytirilgan strategik sheriklik oʻrnatish toʻgʻrisidagi qoʻshma deklaratsiyani imzoladilar.

Tomonlar O‘zbekiston va Vengriya o‘rtasidagi strategik sheriklik va ko‘p tomonlama hamkorlikni mustahkamlash masalalarini muhokama qildilar, barcha sohalarda konstruktiv hamkorlik barqaror rivojlanib borayotganidan mamnunlik bildirdilar.

Mirziyoyev va Orban birinchi bosqichda oʻzaro tovar ayirboshlash hajmini 500 million yevroga yetkazish maqsadida savdo-iqtisodiy aloqalarni yanada rivojlantirish muhimligini taʼkidladi, shuningdek, bank-moliya sohalarida hamkorlikni kengaytirishga kelishib olindi.

Bundan tashqari, Vengriya kompaniyalari ishtirokida O‘zbekistonda Yevropa korxonalari uchun maxsus sanoat zonasini tashkil etish masalasi muhokama qilindi. Buning doirasida iyul oyida Budapeshtda boʻlib oʻtadigan Hukumatlararo aralash iqtisodiy komissiya yigʻilishida investitsiya dasturini tayyorlash va tasdiqlash boʻyicha kelishuvga erishildi.

Turizm va madaniy almashinuvni rivojlantirish maqsadida Vengriya va O‘zbekiston o‘rtasida to‘g‘ridan-to‘g‘ri aviaqatnovlarni qayta tiklash masalasi ham muhokama qilindi.

Ta’lim sohasidagi hamkorlikni rivojlantirish, jumladan, o‘zaro talabalar almashinuvini yo‘lga qo‘yishga alohida e’tibor qaratildi. Bundan tashqari, rahbarlar O‘zbekistonda Vengriya universitetlarining filiallarini ochish imkoniyatlarini muhokama qilib, joriy yilda Toshkentda O‘zbekiston va Vengriya rektorlarining uchinchi forumini o‘tkazishga kelishib oldilar.

Mirziyoyev va Orban tegishli vazirliklarga Oʻzbekiston va Vengriya oʻrtasidagi munosabatlarni kengaytirilgan strategik sheriklik darajasiga koʻtarish niyatini tasdiqlagan holda erishilgan kelishuvlar ijrosini nazorat qilish boʻyicha qoʻshma yoʻl xaritasini tayyorlashni topshirdi.

Muxtasar aytganda, O‘zbekiston va Vengriya rahbarlarining uchrashuvi o‘zaro hurmat va manfaatdorlik tamoyillariga asoslangan strategik sheriklikni yanada muvaffaqiyatli rivojlantirish uchun mustahkam poydevor yaratdi.
Feruza Jumayeva,

Xalq deputatlari Karmana tumani Kengashi deputati,“Milliy tiklanish” demokratik partiyasi a’zosi