Tuman Kengashi qarorlarining huquqiy asoslanganligi bo‘yicha hamkorlik yanada kuchaytiriladi

✅ Xalq deputatlari tuman Kengashi kotibiyati mudiri O‘.Murodov, kotibiyat xodimi Z.O‘zbekova, tuman Kengashi deputati S.Majidova hamda tuman Adliya bo‘limi boshlig‘i N.Mamadiev ishtirokida tuman Kengashi qarorlarining huquqiy asoslanganligi va norma ijodkorligi jarayonlari yuzasidan hamkorlikni yanada kuchaytirish bo‘yicha kelishib olindi.

✅ Yig‘ilish davomida Kengash qarorlari loyihalarining amaldagi qonunchilik talablariga muvofiqligi, ularda huquqiy normalarning to‘g‘ri va aniq ifodalanishi, yuqori turuvchi normativ-huquqiy hujjatlarga havolalarning asoslanganligi hamda qaror loyihalarini ishlab chiqish va huquqiy ekspertizadan o‘tkazish tartiblariga rioya etilishiga alohida e’tibor qaratildi.

✅ Shuningdek, qaror loyihalarini “E-Kengash” elektron tizimi orqali ishlab chiqish, kelishish va huquqiy ekspertizadan o‘tkazish masalalari ham tahlil qilindi. Amaldagi tartibga ko‘ra, Kengash qarorlari loyihalarining qonunchilikka muvofiqligi va yuridik-texnik jihatdan to‘g‘ri rasmiylashtirilishi muhim ahamiyat kasb etadi.

✅ Mazkur o‘rganishlardan asosiy maqsad — tuman Kengashi tomonidan qabul qilinadigan qarorlarning qonuniyligi, huquqiy asoslanganligi va sifatini ta’minlash, norma ijodkorligi jarayonida qonunchilik talablariga qat’iy rioya etish hamda aholi manfaatlariga xizmat qiladigan puxta huquqiy hujjatlarni shakllantirishdan iborat.

✅ Bu kabi hamkorlikdagi ishlar tuman Kengashi faoliyatida qonun ustuvorligini ta’minlash va qarorlar qabul qilish samaradorligini oshirishga xizmat qiladi.